Layihə haqqında

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin sifarişi ilə hazırlanan “Unudulmazlar” saytı və mobil tətbiqi ölkəmizin ərazi bütövlüyünün təmin olunması uğrunda döyüşlərdə şəhidlik zirvəsinə ucalmış qəhrəmanlarımız, mülki şəhidlərimiz, Vətən Müharibəsi ilə əlaqədar əlilliyi müəyyən olunmuş şəxslər haqqında ətraflı məlumat əldə etməyə imkan yaradan, onların cəmiyyətə daha yaxından tanıdılmasına xidmət edən layihədir. www.unudulmazlar.az saytı, İOS və Android sistemlərindən yükləyə biləcəyiniz “Unudulmazlar” mobil tətbiqi Vətən Müharibəsi şəhidləri və əlilləri haqqında ən dolğun informasiya resursudur. Layihədə qəhrəmanlarımızın həyat və döyüş yolunu özündə əks etdirən foto və videolar, Vətən Müharibəsi şəhidlərinin və əlillərinin həyatı, döyüş yolu, təltifləri və ailə üzvləri haqqında əhatəli məlumatlar təqdim olunur. Saytda şəhidlər və Vətən Müharibəsi əlillərinin ad, soyad, ata adı, doğulduğu, döyüşdüyü və şəhid olduğu rayonlar, həmçinin tarixlər üzrə axtarış sistemi mövcuddur. Dinamik axtarış sistemi sayəsində sayt və tətbiqdən Vətən müharibəsi iştirakçıları haqqında istənilən məlumatı əldə etmək çox çevik və asandır. Xronologiya bölməsində 44 günlük Vətən müharibəsinin hər gününü özündə əks etdirən məlumatlar, eyni zamanda Azərbaycan Respublikasının Prezidenti, Müzəffər Ali Baş Komandan İlham Əliyevin müharibə ərəfəsində yazdığı tvitlər yerləşdirilib. “Unudulmazlar” layihəsi Vətən Müharibəsi şəhidləri və əlilləri barəsində ən dəqiq və etibarlı mənbə olmaqla yanaşı, ölkə daxilində və xaricində qəhrəmanlarımızın tanıdılmasına xidmət edir.